काठमाडौँ । फलफूलको राजा मानिने ‘आँप’को सिजन बिस्तारै सकिदैछ । यससँगै नेपाली आँप पनि बजारमा पाउन छोडिएको छ । नेपाली आँपलाई विस्थापित गर्दै भारतीय आँपले पुनः बजार लिन थालेको छ । व्यावसायिक रुपमा अघि रहेको भारतीय आपँले सिजनमा दुई पटक नेपाली बजारमा स्थान ओगट्ने गर्छ ।
बैशाख सुरु भएसँगै नेपाली बजारमा पहेँलो आँप देखिन थाल्छ । हाल भने नेपालमा ९०:१० को अनुपातमा भारतीय तथा नेपाली आँप पाइन्छ । ‘नेपाली आँपको सिजन सकिन थालेसँगै किरा लागेको, कुहिएका तथा फत्केका आँप मात्र बजारमा पाइन्छ जुन उपभोक्ताले रुचाउँदैनन्,’ बल्खु फलफूल बजारका आँप व्यवसायी रितेश कुमार गुप्ता भन्छन् । दैनिक सय मेट्रिक टन जति आँप भित्र्ने गरेको उनको अनुमान छ । जेठबाट सुरु हुने नेपाली आपँको याम असारसम्म सिजन हुन्छ । उक्त समय भारतीय आँप तुलनात्मक रुपमा केही कम नै हुन्छ ।
भारतमा ठुलो परिमाणमा आउने कारण पनि नेपाली आँपको तुलनामा १० देखि १५ रुपैँयाले नेपाली आँप अझ महंगो हुन जाने उनले बताए । यद्यपि, हाल बजारमा पाइने आँप भारतीय भएको उनी बताउँछन् ।
कालीमाटी तरकारी बजारमा ४८ प्रतिशत भारतीय आँप
कालीमाटी तरकारी तथा फलफूल विकास समितिका प्रवक्ता विनय श्रेष्ठका अनुसार गत असारसम्म तीन सय ३८ मेट्रिक टन आँप कालीमाटी तरकारी बजारमा भित्रिए । जस मध्ये एक सय ८८ मेट्रिक टन भारतबाट आएको जानकारी उनले दिए ।
बाँकी दुई सय मेट्रिक टन नेपाली मूलका आँप हुन् । जसमा सिरहाबाट २८ टन, सर्लाहीबाट १७ टन, सप्तरीबाट २५ टन महोत्तरीबाट १७ टन, धादिङबाट १८ टन, काटमाडौँ १० टन तथा बाँके, बारा, धनुषा, पर्सा, मकवानपुर, रैतहट आदि स्थानबाट पनि केही मात्रामा आँप कालीमाटी भित्रिए ।
‘कालीमाटीमा फलफुलको कारोबार खासै ठुलो छैन ’, प्रवक्ता श्रेष्ठ भन्छन्, ‘यस कारण पनि आँपको कारोबार कालीमाटीमा कम देखिएको हो ’ । आँपमात्र नभई एभोकार्डो, अनार, सुन्तला जस्ता फलफूलमा पनि वर्षेनी अरबौँको नेपाली रकम विदेश भित्रिरहेका छन् ।
.
