काठमाडौ । ६ महिनादेखि ५ बर्षसम्मका बालबालिकाहरुलाई भिटामिन ए क्याप्सुल र जुकाको औषधी खुवाउने “राष्ट्रिय भिटामिन ए कार्यक्रम” आज देशभरि एकैसाथ सञ्चालन सुरु भएको छ । बिहिबार र शुक्रबार सञ्चालन हुने कार्यक्रममा ६ महिनादेखि ५ बर्षसम्मका बालबालिकालाई भिटामिन ए क्याप्सुल खुवाइने र १ देखि ५ बर्षका बालबालिकालाई जुँकाको औषधीका साथै बालभिटा वितरण गरिने स्वास्थ्य मन्त्रालयले जनाएको छ ।
दुई दशकभन्दा बढि समयदेखि महिला स्वास्थ्य स्वयम् सेविकाहरु मार्फत भिटामिन ए क्याप्सुल खुवाउने कार्य बैशाख र कार्तिक गरि बर्षको दुई पटक सञ्चालन हुदै आएको छ । यस बर्ष बैशाख ६ र ७ गते सञ्चालन गर्नु पर्ने राष्ट्रिय भिटामिन ए कार्यक्रम कोभिड १९ का कारण असार २२ र २३ गते गरिएको थियो भने कार्तिकमा खुवाउनु पर्ने भिटामिन ए मंसिर ११ र १२ गते खुवाउने निर्णय भएको थियो ।
यस चरणमा देशभरका ६ महिनादेखि देखि ५ बर्षसम्मका २७ लाख बालबालिकाले भिटामिन ए क्याप्सुल, २४ लाख जनाले जुँकाको औषधी खाने र ६ लाख जनालाई बालभिटा वितरण गरिने लक्ष्य रहेको छ । त्यसका लागि करिब ५२,००० महिला स्वास्थ्य स्वयम् सेविका परिचालन गरिने स्वास्थ्य मन्त्रालयले जनाएको छ ।
भिटामिन ए क्याप्सुलले बाल मृत्युदर घटाउन तथा बालबालिकाहरुमा भिटामिन ए को कमीका कारण हुनसक्ने स्वास्थ्य जटिलता न्युनीकरण गर्न महत्वपुर्ण भुमिका खेल्ने विज्ञहरु बताउछन् ।
.
